=''/>

24, జులై 2015, శుక్రవారం

గోదావరి పుష్కరాలు 2015

టీవీ లోను , పేపర్ లోను పుష్కరాలకి వస్తున్న జనాన్ని చూస్తూ దురదుష్ట వశాత్తూ  మొదటి రోజే జరిగిన పెద్ద దుర్ఘటన  కొంచెం భయాన్ని పెంచింది . ఈ సారి పుష్కర స్నానం చెయ్యగలమా?ఘాట్స్  దగ్గర ఎలా వుంటుందో  ? పైగా పుష్కరాలు దగ్గరకు వచ్చేవరకూ పనులు చేస్తూనే వున్నారు.ఇలా సవాలక్ష అనుమానాలతో ఉదయం ఆరు గంటల లోపు అయితే పెద్దగా జనం వుండరు అని మాకు దగ్గర ,మేము ఎప్పుడు వెళ్ళే గోవుపాదాల రేవుకి వెళ్లి పుష్కర స్నానం చేసాం . 

వెళ్ళే జనం వెళ్తూ వచ్చే జనం వస్తూ సందడి సందడిగా కనుల పండగలా వుంది అక్కడకి వెళ్లేసరికి . 

క్రితం  పుష్కరాలకి ఏర్పాట్లు ఎలా చేసారో గుర్తులేదు కానీ ,ఈ సారి మాత్రం ఏర్పాట్లన్నీ చాలా బాగానే చేసారు .నా వరకు అయితే చాలా బాగానే నచ్చింది . 

కొన్ని అనుకోని దుర్ఘటనలు జరగడంతో  అంత జరిగాక ఆ మాత్రం చెయ్యరా అనుకోవచ్చు కానీ ఏర్పాట్లన్నీ ఒక్కరోజులో అనుకుని చెయ్యరు కదా .. ఎవరయినా బాగా చెయ్యాలి.ప్రజలు ఇబ్బందులు పడకూడదు అనే అనుకుంటారు .


మా జిల్లా కలెక్టర్ గారూ,వారి క్రింది అధికారులు  ఎన్ని నెలలనుండి కష్టపడి చేసుంటారో ..


లేడిస్ బట్టలు మార్చు కోవడానికి    కంటైనర్ లు పెట్టారు తీగలతో సహా ..ఎవరికొచ్చిందో కానీ మంచి ఆలోచన అనిపించింది . అసలు నది స్నానానికి వెళ్లి లేడిస్ ఎవరయినా ఇబ్బంది పడేది  అక్కడే ..    కొవ్వూరు లో ఒక రేవులోనే అలా పదో పదిహేనో పెట్టారు . 


పట్టిసీమ ,తాళ్ళపూడి ఇలా చిన్న వూళ్ళలో రేవుల్లో కూడా ఇలానే వున్నాయి అని వెళ్ళొచ్చిన    వాళ్ళు  మాట.

నదిలో వేసే పూలు ,కొందరు మూర్ఖం గా ఎక్కువ పుణ్యం వచ్చేయాలని  గోదాట్లో   వేసే కొబ్బరికాయలు,అరటి పళ్ళు,జాకిట్టుముక్కలు తో సహా  ఇంకా ఏవేవో పెద్ద పెద్ద నెట్ల తో ఎప్పటికప్పుడు బోట్లలో చుట్టూ తిరుగుతూ తీస్తూనే వున్నారు.

 కొన్నిలక్షల మంది వస్తే వాళ్ళు ఎంత చేస్తే ఏం సరిపోతుంది .అయినా వాళ్ళ ప్రయత్నం వాళ్ళు చేస్తూనే వున్నారు పోద్దస్తమాను.


ఘాట్స్ పైన కూడా ఎక్కడ కాగితం కానీ ప్లాస్టిక్ సంచులు కానీ ఏవున్నా పాపం అలా తీస్తూనే వున్నారు చాలా మంది.అడుగడుక్కి తుక్కుబుట్టలు పెట్టారు .కొందరు స్వచ్చందంగా చేస్తున్నారు  . ఉదయం ఆరుగంటలకే ఓ పెద్దాయన చక చకా అన్ని ఏరి తుక్కుబుట్టల్లో వెయ్యడం చూస్తే   వీళ్ళకి ఏమిచ్చినా తక్కువే అనిపించింది . .

పిండప్రదాన రేవుల్లో బ్రాహ్మలు కూడా కింద వెయ్యకండి అక్కడ బుట్టల్లో వెయ్యండి అని చెప్తున్నారంటే   ఏదయినా ఎవరో ఒకరి   వల్ల అవ్వదు అందరి సమష్టిగా చెయ్యడం వల్లే కదా అనిపించింది.ఘాట్స్ కూడా రెండు మూడు గంటలకి వాటర్ తో  క్లీన్ చేసేస్తున్నారు . 


ఇక ఉచిత బోజనాల సంగతి చెప్పక్కర్లేదు . వూళ్ళ పొడవునా ఎక్కడిక్కడ రోడ్ల పక్కన  చిన్న చిన్న టెంట్ లు వేసి ఎవరికి  తోచినట్టు వాళ్ళు .  


ఇవన్నీ నేను వెళ్ళిన రెండు రోజుల్లో వున్నరెండు మూడు గంటల్లో గమనింనవి .వాళ్ళని చూస్తే ఇంట్లో  ఏమాత్రం వీలయిన ఒక్కరోజయినా  వెళ్లి వాళ్ళలా సేవ చెయ్యగలిగితే బాగుండును అనిపించింది. 


 మీడియా లో వచ్చినట్టు  వాటర్ చేంజ్ అయింది అని రెండో సారి వెళ్ళినప్పుడు  అనిపించింది . కానీ గోదావరిలోకి కొత్త నీరు వచ్చి చేరడం తో ఫ్లో బాగా వుండి బాగానే ఉందంటున్నారు ఇప్పుడు.


అందరి సహకారంతో మా గోదారి పుష్కరాలు ఘనంగా జరుగుతున్నాయి. 


 ముగింపు దశ చేరుకున్న గోదావరి పుష్కరాలు ఎటువంటి చెడు సంఘటన లు జరక్కుండా అంతా ప్రశాంతం గా జరిగిపోవాలి గోదారి తల్లి !!










                                             నదిలో వదిలే   వాటిని తియ్యడం కోసం చూస్తూ ..





   సత్యసాయి సేవాసంస్థ  వాళ్ళు   చాలా  బాగా చేస్తారు ఎప్పుడూ . క్రితం పుష్కరలప్పుడు కూడా చెప్పుకున్నారు . మాడమ్ ! వాటర్   కావాలా ? అని  చిన్నతను  బుజాన పొలం లో చేలకి మందు పిచికారి చేస్తారు దాన్ని వాటర్ ఇవ్వడానికి అనుకూలం గా మార్చినట్టున్నారు అది   వుంది అతని చేతిలో  .




                                                                       
                                                                  గోదావరి మాత !!
        

                                                         


                                                                 
                                                                      మైలు తెప్పలు !

 అం త కరెక్ట్ గా తెలీదు . శివరాత్రి అప్పుడు కూడా అంటారు . పెద్దల జ్ఞాపకార్ధం అనుకుంటా నదిలో  మైలు తెప్పలు 
వదులుతారు .





                                                       
                                                                     జంగం దేవరలు !


 
                                     



 









22, డిసెంబర్ 2014, సోమవారం

పనసపొట్టు కూర


  ఈ రోజుల్లో  మా వైపు కార్తీక మాసం రావడం తోనే పనసకాయలకోసం వేట మొదలు పెట్టేస్తారు .ద్వాదశి  బోజనాలు ,వన బోజనాలు ,అయ్యప్పల బోజనాలకనీ,ఈలోపు ఏవన్నా  ఫంక్షన్స్ వస్తే   వాటికి " పనస పొట్టు "  కూర మెనూ లో తప్పని సరన్నమాట .   
ఎవరన్నా  పనసకాయల కోసం వస్తే వాళ్లకిస్తూ ఎప్పుడన్నా ఇంటికి తెస్తే ఆ కాయను  పొట్టు    కొట్టాలంటే  బిందిలింగం ( ఊరుమ్మడి వడ్రంగి ) రావాల్సిందే .. 


మొన్నోరోజు అలాగే తెస్తే  పోట్టు కొట్టించి మొదటిసారి నేనే స్వయం గా కూర చేసా .అంటే ఎప్పుడూ చెయ్యడం కష్టం ,పెద్దవాళ్ళు చేసినట్టు చెయ్యగలనో  లేదో  ,ఆ రుచి నాకు వస్తుందా ఇలా అనుకుంటూ  ఎవరో ఒకరి తో  వండించడమే అన్నమాట  .   
పనస పొట్టు కూర  వండటం  ఎంతో  తేలికని    మొదటి  సారి తెలిసింది .. 
ఎంత తేలిక గా చేయ్యోచ్చంటే  .. 
 పనస పొట్టుకి సరిపడా చింతపండు గుజ్జు తీసుకుని,  కుక్కర్లో  పొట్టు తో పాటు చింతపండు గుజ్జు  ,  రెండో ,మూడో ఎన్ని  పడతాయంటే అనుకుంటే అన్నిపచ్చి మిరపకాయలు మధ్య కు కోసుకుని అవీ,సరిపడా ఉప్పు వేసి, కొంచెం పసుపు, నీళ్ళు చాలా కొద్దిగా చూసుకుని పోసుకోవాలి. పొట్టు కాస్త ఆవిరి  కి  ఉడికి పోతుంది .  కుక్కర్ మూత పెట్టి మూడు కూతలు వేసేక స్టౌ కట్టేసుకోవాలి .  
కుక్కర్ మూత తీసుకుని నీరు   ఉంటే   పోయే వరకూ ఉడకబెట్టుకుని   ,
జీడిపప్పు,వేరుసెనగ గుళ్ళు ,సెనగపప్పు,మినప్పప్పు,ఆవాలు,జీలకర్ర ,ఎండుమిర్చి ,కరివేపాకు తో తాలింపు పెట్టుకుని కూర   వేడి తగ్గాక  కాస్త  ఆవపిండి కలుపుకుంటే పనస పొట్టు  కూర తయార్  :) 



ఇప్పుడిప్పుడే వస్తున్న  లేలేత  గింజ పట్టని చిన్న చిన్న పనసకాయల పై   తొక్క తీసేసి కడిగి ,కాస్త పసుపు నూనె రాసి ఇలా పొట్టు  కొడతారు .






18, డిసెంబర్ 2014, గురువారం

ఇవన్నీ మా ఊరి పక్షులే :)

రకరకాలా పక్షులు అదీ మా ఊళ్ళో !
వాటిని చూస్తుంటే  నాకెంత ఆశ్చర్యమంటే  ఇవన్నీ ఈ మధ్య నుండే వస్తున్నాయా  మా ఊరు ?లేకపోతే  నేను ఇప్పుడు వాటిని కొత్తగా చూస్తున్నానా ? అనిపిస్తుంది .
 వాకింగ్ కి వెళ్ళడం మొదలు పెట్టినప్పటినుండీ నాకు పక్షులపిచ్చి బాగా పట్టుకుంది .పక్షుల కూతలు వింటూ ఏ   పిట్ట  ఎలా కూస్తుందో తెలుసుకుంటూ బాగా గమనించడం అలవాటు చేసుకున్నా.
ఇక మేం వాకింగ్ కి వెళ్ళే దారిలో చిలకల సందడి గురించి చెప్పక్కర్లేదు .
సాదారణంగా కొన్ని పక్షులు గూళ్ళు కట్టుకుని గుడ్లు పెట్టే రోజుల్లో వలస వస్తాయంటారు కానీ ఇవలా అనిపించడం లేదు .
కొన్నయితే ఉదయాన్నే ఇంట్లో   చెట్ల మీదకి వచ్చేస్తుంటాయి.వాటి కూత వినగానే అలవాటుగా చేసే పని కాస్త పక్కన పెట్టి వాటిని విసిగించకుండా అప్పుడప్పుడూ కుదిరితే ఓ ఫొటో తీస్తుంటానన్నమాట :)



ఇదేదో   Golden fronted leafbird  అట 


కింగ్ ఫిషర్ ! రోజూ  ఉదయాన్నే వస్తుంటుంది .  దాని విజిల్ (దాని కూత అచ్చు విజిల్ వేసినట్టు ఉంటుంది ) విని  వెళ్లి  ఫోటో  తీసే లోపు  నన్ను చూసి ఎగిరిపోతూ  ఇలా చిక్కింది .




 ఏమి చిలుకలో ..విటినీ ,వీటి అల్లరి ఎంతిష్టమంటే  ఊరికే  అరుస్తూ  ,గోల గోలగా అటు ఇటు ఎగురుతూ అల్లరి  చేస్తూ తిరుగుతూ ఉంటే  ఇంకాసేపు   అక్కడ  వుంటే బావుండుననిపిస్తుంది .కానీ వాకింగ్ మేట్స్  ముందుకు వెళ్లి పోతుంటే  నేను    వెనక్కి  వెనక్కి  మెడ నొప్పెట్టేలా  చిలుకల్ని వదల్లేక  వీలయితే కొన్ని  ఫోటో లు తీసుకుని వెళ్తుంటా .


వడ్రంగి పిట్ట ఉదయాన్నే టక టకా  చెట్టు ని పొడుస్తూ


ఈ బుల్లి పిట్టలను  ఏమంటారో  మరి ?


ఉయ్యాలూగుతూ బుజ్జి  పిచుకమ్మ ..
చిన్నప్పటినుండి ఉన్న ఊరే అయినా నేనింత వరకు వాటిని అంతగా గమనించలేదేటబ్బా  అనుకుంటా అప్పుడప్పుడూ .. వీటిలో కొన్ని అందరికీ తెలిసినవే అయ్యుండొచ్చు కానీ నేను తీసిన మాఊరు పక్షులు ,పిట్టలు చూపిస్తున్నా అనుకోండి మరి :)

13, డిసెంబర్ 2014, శనివారం

అయ్యో నా బ్లాగ్ !

బ్లాగ్  లో పొస్ట్ రాసి సుమారు రెండు నెలలు అయింది .పోనీ అలా అని ఈ రెండు నెలల్లోనూ బిజీ బిజీ గా చేసిన ఘనకార్యమేమన్నా ఉందా అంటే అదీ లేదు .
మరెందుకబ్బా  రెండు నెలలనుండి  బ్లాగ్ లో ఏమీ రాయలేదు అంటే..  ఏమో నాకే తెలియట్లేదు .
 అయ్యో నా బ్లాగ్ !పాపం దాని ఆలనా పాలనా పట్టించుకోకుండా  అనాధ లా వదిలేసానే అని అప్పుడప్పుడూ  కాసేపు చింతిస్తూ వుంటాను కూడా .  అయ్యో ఓ పోస్ట్ అన్నా రాయాలి ! అని ఎప్పటికప్పుడు   అనుకోవడంతోనే  అలా అలా  రోజులు జరిగిపోయి నెలలూ గడిచిపోయాయి .
బ్లాగ్ మొదలు పెట్టిన కొత్తలో  ఏం చేసినా ?ఏం చూసినా బ్లాగ్ లో  టపాకి పనికొస్తుందా అన్నట్టు చూస్తుండేదాన్ని :)
ఇది కూడా రాసేస్తావా నీ బ్లాగ్ లో   అంటూ   మా పిల్లలు  అడుగుతుండే వాళ్ళు .
 అలాంటిది ఇప్పుడేమో  ఈ  బ్లాగ్ ప్రపంచం లో నాకంటూ చిన్ని గుర్తింపు నిచ్చిన  నా బ్లాగ్ నే మర్చి పోయానేమో అనిపిస్తుంది  .
 ఇంతసేపూ  ఈ డబ్బా ఎందుకంటే ఇకనుండి  నెలకి కనీసమంటే కనీసంగా  ఓ రెండు మూడు పోస్ట్ లన్నా రాయాలని కంకణం కట్టుకున్నా..
   మరి  కట్టుకున్న కంకణాన్ని  విప్పేస్తానో  ?ఇంకా బిగించి కట్టుకుంటానో ?



 




18, సెప్టెంబర్ 2014, గురువారం

పిచుకమ్మ స్నానం ఎలా చేసిందంటే .. ఫొటోలు చూడండి మరి !

మా ఇంట్లో బుజ్జి పిచుకమ్మలు తిరుగుతూ ఉంటాయన్నా కదా ! వాటిలో ఒకటి కార్కు నుండి లీకయ్యే  నీటి  దార కిందకు చేరి ఇదుగో ఇలా చేసిందండీ స్నానం :) 
 











11, సెప్టెంబర్ 2014, గురువారం

కొన్ని సూర్యోదయాల ...సూర్యాస్తమయాల ఫోటోలు

  బాపూ గారి  ముత్యాల ముగ్గు సినిమా లో డైలాగ్ గుర్తుందిగా  ... "సెగెట్రీ  ,ఆకాశం లో ఎవరో మర్డర్ చేసినట్టు  లేదూ  .. మనిసన్నా క కాతంత కళా పోషణ ఉండాలోయ్ "   
అలా   ఆకాశం ఎర్రబడ్డట్టు కనిపిస్తే చాలు  నా చెయ్యి నా ప్రమేయం లేకుండానే కెమెరా మీదకు పోతుంది . ఎంత పనిలో  ఉన్నా సరే  ఆ కాసేపు అంటే ఓ ఐదు ,పది నిముషాలు ఆ పని  పక్క కి జరిపి ఈ పనిలో పడతా నన్నమాట!   
అది ఉదయమైనా   సాయంత్రమైనా సరే .. 

ఇలా  ఉదయాలూ,సూర్యాస్తమయాలూ చూస్తున్నా ,తీస్తున్నా చాలా సార్లు బాపూ గారూ,ముత్యాల ముగ్గు డైలాగ్ గుర్తొస్తుంటుంది .  ఇప్పుడాయన   అక్కడికెళ్ళిపోయారుగా అందుకే ఆయన్ని నా ఫొటో ద్వారా అక్కడున్నట్టు  ఏదో చిన్ని ప్రయత్నం !






















ఎలా వున్నాయి మరి మా ఊరి సూర్యో దయాలు ,అస్తమయాలు .. 
మరి  మీరు కాస్త చెప్తే నేను బోల్డు సంతోషిస్తాన్నమాట  :)

9, సెప్టెంబర్ 2014, మంగళవారం

ఈ మధ్య తీసిన కొన్ని ఫొటో లు !