=''/>

27, సెప్టెంబర్ 2013, శుక్రవారం

గోరుమిఠీ ( మిఠాయి)

గోరుమిఠీ  అసలు పేరు గోరుమిఠాయి అయిఉంటుంది.వాడుక  బాష లో  ఇలా గోరుమిఠీ  అయిపోయిందన్నమాట! మా గోదావరి జిల్లాల్లో సారె లో పెట్టే స్వీట్ల లో ఇదీ ఒకటి.(ఇతర చోట్ల కూడా చేస్తారేమో )

ఇవి చేయడం అందరికీ కుదరదు .మా ఉళ్ళో ముగ్గురో  ,నలుగురో  ఉన్నారు .ఎప్పుడన్నా చెయ్యాలంటే వాళ్లకి కబురంపి వాళ్ళొస్తామంటేనే చేసుకోవాలి .మా అమ్మమ్మ బాగా చేస్తుంది .తను చేసినప్పుడు  నేర్చుకుందామని చేస్తుంటా కానీ తనకి వచ్చినంత పలచగానూ,చక్కగా వెళ్ళు పడేలానూ రాదు . నాకు సరిగ్గా రావడం లేదంటే ఖాళీగా ఉన్నప్పుడు కాస్త  పిండి కలుపుకుని  ప్రాక్టిస్ చెయ్యి  వచ్చేస్తుంది నేనలాగే చేసేదాన్ని  అంటుంది.

 ఇప్పుడు గవ్వలు చేసుకోవడానికి  ఉన్నట్టే  ఇవి చేయడానికీ అచ్చులు వచ్చేసాయి .ఎవరూ చేసేవాళ్ళు దొరకనప్పుడు దానిమీదే చేస్తాం .


చూపుడువేలు ,బొటనవేలు మధ్యలో పిండి పెట్టి ఇలా నొక్కుతారు .ఎంత పెద్ద  సైజైనా అంతే .

ఇలా చేయడం చూసి వేళ్ళతో చేస్తారు కాబట్టి వేలుమిఠీ అనాలి కానీ గోరుమిఠీ అంటారేంటి? అనడిగేడోసారి  మా సాయి.వేలు మిఠీ  అంటే బాగోలేదని  గోరుమిఠీ అంటున్నారేమో అన్నా :)

                                                       


                                             
 
  నూనెలో వేసేటప్పుడు ఇలా వేళ్ళతో తీసి వేయాలి .అప్పుడే చక్కగా అర్ధచంద్రాకారంలో  వస్తాయి .



పంచదార పాకం పడితే గోరుమిఠీ  తయార్ :)  

21, సెప్టెంబర్ 2013, శనివారం

బ్లాగ్ మొదలుపెట్టి నాలుగేళ్ళైంది!!


మా ఇంట్లో అందరి పుట్టినరోజులూ  ఈ రెండు నెలల్లో జరుపుకున్నాం .కానీ  ఈ నెలలోనే  వచ్చిన నాకెంతో ఇష్టమైన   నా బ్లాగ్ నాలుగో పుట్టినరోజుని మాత్రం మర్చిపోయా:(   పాత  పోస్ట్లు  తిరగేస్తుంటే చూసా !

ఈ నాలుగేళ్ళనుండీ  ప్రతీ సంవత్సరమూ  బ్లాగ్ మిత్రులతో కలసి నా బ్లాగ్ పుట్టినరోజు జరుపుకుంటున్నా .అందుకే ఈ ఏడూ ఆలస్యంగానైనా మీ అందరి ప్రోత్సాహం ,ఆశీర్వచనాలు అందుకోవడం కోసం మీ ముందుకొచ్చేసింది .

 నా బ్లాగ్  విజయవంతంగా ఐదో సంవత్సరంలోకి  అడుగిడుతున్న సందర్భంగా  బ్లాగ్ ని చదివేవారికి ,కామెంట్లు రాసేవారికి అందరికీ  నా సత్యప్రియ తరుపున ధన్యవాదాలు .




17, సెప్టెంబర్ 2013, మంగళవారం

మా ఊరి గణపయ్య -నిమజ్జనం

ప్రతీ సంవత్సరం లానే ఈ ఏడూ మా ఊరి 'గణపతి ఉత్సవాలు'  ఊరంతా కలిసి ఎటువంటి ఆటంకం కలగకుండా చక్కగా జరుపుకున్నాం.


మా గణపయ్య  ..ఆపక్కనే మా గ్రామ దేవత 



ఐదు కేజీల లడ్డూ  వేలంలో 9999 రుపాయలు పలికింది .మా ఊరి రికార్డ్ !




ఒకరోజు జడ కోలాటం  ప్రోగ్రాం పెట్టేరు .సీతమ్మ వాకిట్లో సిరి మల్లె చెట్టు ఆడియో రిలీజ్ ఎవరైనా చూసేరా ?అప్పుడు జరిగిన కోలాటం  వీళ్ళు చేసిందే నట !  









కోలాటం చేస్తుంటే జడ అలినట్టు వస్తుంది . ఆఖరికి కోలాటం చేస్తుండగానే ఆ అల్లిక విడిపోతుంది.





పదిహేను ట్రాక్టర్ లలో పిల్లలు ,పెద్దలు రకరకాల వేషాలు ధరించి అనుసరించగా నిమజ్జనానికి  ఊరేగింపుగా బయలు దేరిన మా గణపయ్య !


పాపం ఉదయం పది గంటలకు వేసిన మేకప్! రాత్రి పది గంటల వరకూ అలానే ఉన్నారు.











13, సెప్టెంబర్ 2013, శుక్రవారం

గిజిగాడి గూళ్ళు

 ఉదయమే దొడ్లో ఉన్న కొబ్బరి  చెట్లు చెరపడానికి (తయారైన కాయలు,ఎండిపోయిన కొమ్మలు,మట్టలు తీసివేయడం )కూలీలొచ్చివాళ్ళ పని వాళ్ళు చేసుకుపోయారు .

వాళ్ళు వెళ్ళిన కాసేపటికి మొక్కల్లోకెల్తే ,గిజిగాడిగూళ్ళు ఉన్న కొబ్బరి కొమ్మలు చెట్టు కింద కనిపించాయి .కొబ్బరి కొమ్మలకి గూళ్ళు కట్టుకున్నట్టున్నాయి ..అయ్యో !నరికేటప్పుడు చూస్తే వద్దని వాళ్లకి  చెప్పుదునే అనుకున్నా.లక్కీగా ఆ గుళ్ళలో గుడ్లు,పిల్లలు లేవు .



  
పిల్లల్ని పోషించేబాధ్యత   ఆడ పక్షులదైతే, గూళ్ళు కట్టే పని పూర్తిగా మగ పక్షులదేనట. కొబ్బరి ఆకుల్ని చీల్చుకొచ్చి ఆపోచలతోఅల్లాయి గూడుని.   ఇంజనీర్ల నేర్పరితనంతో, ఎంత కళాత్మకంగా కట్టు కున్నాయో!మెత్తమెత్తగా భలే ఉన్నాయి చూడటానికి. దూరంగా చెట్లకి,కరెంట్ తీగలకి వేలాడుతూ చూడటమే కానీ ఎప్పుడూ ఇలాదగ్గరగా చూడలేదు .








2, సెప్టెంబర్ 2013, సోమవారం

ఈ రోజు ఉదయం కురిసిన వానలో తడిసి ముద్దైన మా ఇంటి మందారాలు


ఈ రోజు ఉదయం లేచేటప్పటికే ,ఆకాశమంతా నల్లటి  మేఘాలతో నిండి ఎప్పుడెప్పుడు వర్షించేదా ?అన్నట్టుంది . పొద్దు పొద్దున్నే అలా ఉంటే చాలా బద్దకంగా మళ్ళీ  దుప్పటి  ముసుగెట్టేయాలనిపించింది..




కానీ తప్పదుగా!ఎలాగో బద్దకాన్ని వదిలించుకుని పనిలో పడ్డా ...  మధ్య మధ్యలో ఆ మబ్బుల్ని ,దబదబా పడే వర్షాన్ని చూస్తూ  ,కెమేరాతో పట్టేస్తూ ఎలాగో పని కానిచ్చేసా!









 నాపని ముగిసే సమయానికి వాన వెలియడం తో  ..  చినుకుల ఆబరణాలు ధరించి మిలమిలా మెరిసిపోతున్నమందారపూల  సోయగాలని  బంధించి మీముందుకు తెచ్చేసా!