=''/>
మా కబుర్లు లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
మా కబుర్లు లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు

27, జూన్ 2014, శుక్రవారం

చిన్న పని కి పెద్ద సంతోషం :)


ఈ రెండు రోజుల నుండీ కాస్త చల్ల బడింది కానీ ఈ వేసవి లో  ఎండలు ఎలా మండిపోయాయీ ..

మా ఇంటి చూట్టూ  చెట్లూ  ,పక్కనే పొలం వుండటం వల్ల పక్షులూ ,ఉడుతలూ  ఇంట్లో బాగా తిరుగుతుంటాయి.
అసలే వేసవి పాపం ఆ చిన్ని ప్రాణాలు ఈ వేడిని ఎలా తట్టుకుంటాయా అనిపించేది వాటిని చూస్తుంటే.

వేసవి లో వాటికి ఉదయాన్నే ఓ గిన్నెలో నీళ్ళు పోసి పెట్టడం అలవాటు. అదో   పెద్ద  సంతోషాన్నిచ్చే పని .  అలా పెట్టిన నీళ్ళు అవి తాగుతుంటే  చుట్టానికి  భలే  వుండేది .  వీటిని  ఫోటో తియ్యడానికి నాకు నాలుగు రోజులు పట్టింది .  ఏ  మాత్రం సడైనా  తుర్రు మనేవి . ఎలాగో  సడి   చప్పుడూ  చెయ్యకుండా వాటిని క్యాచ్ చేసేసా :)























25, మార్చి 2014, మంగళవారం

అమ్మమ్మూరిలో దుర్గమ్మ తీర్థం (తిరుణాళ్ళు ) !

అమ్మమ్మ వాళ్ళూరు  రెడ్డి గణపవరం ! రెడ్డి గణపవరం ,ఆ చుట్టుప్రక్కల ప్రాంతాలన్నింటినీ పదిహెనో శతాబ్ధం లో రెడ్డిరాజులు పరిపాలించారట .రెడ్డిరాజుల కాలం నాడు కట్టించించిన శివాలయం  ఇప్పటికీ చెక్కు చెదరకుండా అలానే ఉంది.నిత్యం పూజలూ జరుగుతున్నాయి. 

అక్కడే   వెలసిన" కనకదుర్గమ్మ"కు వంద సంవత్సరాల పూర్వం   నుండీ     ప్రతీ సంవత్సరం హొలీ పౌర్ణమి నుండీ  ఐదు రోజుల పాటు తీర్థం ఘనం గా జరుగుతుంది. 
చిన్నప్పుడు  తీర్థం ఎప్పుడొస్తుందా అనెదురు  చూసేవాళ్ళం . ఎంచక్కా ప్రతీ  ఏడూ  బడె గ్గొట్టేసి  మరీ వెళ్లి ,ఐదు రోజు లూ ఎండ ను కూడా  లెక్క చేయకుండా తిరిగేసేవాళ్ళం . 
ఈ మధ్య  వెళ్లి  ఐదారేళ్ళవుతుందేమో !  ఈ సారి సరిగ్గా తీర్థం  జరిగే టైం  కి అనుకోకుండా సెలవలు కలిసొచ్చి    హాస్టల్ నుండి సాయి  వచ్చాడు .  చెల్లి ,పిల్లలు కూడా రావడం తో అందరం కలసి వెళ్లాం . 




  

  దుర్గమ్మ గుడి ! మా చిన్నప్పుడు చిన్న గుడిసె లా ఉండేది .ఇప్పుడిలా ఉంది. 


 రెడ్డి రాజుల కాలం నాటి శివాలయం  . ప్రతీ  సంవత్సరం రంగులు వేసి వేసి  చుట్టానికి రాతి కట్టడం లా అనిపించదు.


               
ఇప్పటికీ చెక్కు చెదరకుండా ఉన్న రాతి మండపం .









ఇటువంటి రాతి స్తంభాలు  రెండు , తుప్పల్లో  గుడి కి కాస్త దూరం లో ఉన్నాయి. దాని మీద డిజైన్ఇప్పటికీ చక్కగా కనిపిస్తుంది . వాటిని చూసిగుడి  దగ్గరే కాక వీటి దగ్గర కూడా శుబ్రం   చేయించాల్సిందే అనిపించింది .

 
గుడి కొచ్చే భక్తుల కోసం దుకాణాలు.






అక్క ,అమ్మమ్మ   ప్రతీ సంవత్సరం   బోల్డన్ని గాజులు  కొని పంపుతారు.ఈ సారి మేమే కొనుకున్నాం సంవత్సరానికి సరిపడా :)






ఎండలో తిరిగి అలసిపోయి   గోళీ సోడా  :)




జీళ్ళు  
                                                           








 చిన్నప్పుడు  తీర్థం లో బొమ్మలు   కొనుకెళ్ళి ... అబ్బ ! వాటిని ఫ్రెండ్స్ కి చూపి వాళ్ళని ఏమేడిపించే వాళ్ళమో  :)








19, ఫిబ్రవరి 2014, బుధవారం

నేనూ నడుస్తున్నా !


మా ఊళ్ళో    సాయంత్రపు నడకకు పోయే  లేడీస్ బాచ్ ఒకటుంది .బాచ్ అంటే ఓ పది మందుంటారు  కానీ ఎప్పుడూ మానకుండా వెళ్ళేది మాత్రం ఐదారుగురే . మిగిలిన వాళ్ళు అప్పుడప్పుడూ చుట్టపు చూపుగా  వెళ్ళే వాళ్ళు . 

వాకింగ్  కి వెళితే  నాలుగైదు కిలో మీటర్లన్నా  నడవాలి కదా అందుకే  పొలం  వెళ్ళే దారినే  వాకింగ్ కి  ఎంచుకున్నారు. 

సాయంత్రం  మూడు గంటలకే నడకకు పోయే వాళ్ళు అరుగుల మీదకి చేరిపోతారు.ఒకవేళ ఆ టైమ్లో ఎవరన్నా పెండ్లి పిలుపులకు వచ్చినా వాకింగ్  వెళ్ళేవాళ్ళు  ఎవరో ,ఎక్కడుంటారో తెలిసిన వాళ్ళైతే అక్కడికే వెళ్లి చెప్పేస్తారు .   

 అందరూ వచ్చి బయలుదేరే లోపు వాళ్ళ కబుర్ల  లో మూడు  వీదుల  విశేషాలూ దొర్లిపొతాయి.  అంటే మరీ సినిమాల్లో చూపినట్టు ,పుస్తకాల్లో రాసినట్టు కాదండోయ్ .. చింత పండు ఎవరు ఎక్కడనుండి తెప్పించారు? ఎక్కడ మంచిది దొరుకు తుంది?పండు మిరపకాయలు వచ్చాయా? వడియాలు  ఎవరెప్పుడు పెట్టుకుందాం ?ఇంకా  ఇలాంటి చాలా సంగతులన్న మాట ! వర్షా కాలం లో  సన్నగా వర్షం పడుతున్నా  గోడుగులేసుకుని  మరీ  వాళ్ళ నడక ను సాగిస్తారు . 

మా పిన్నైతే ఇంట్లో ఎంత పనున్నా వాకింగ్ మాత్రం మానదు. పనున్నప్పుడు కూడా వాకింగ్  ఎందుకు ? మానేయొచ్చుగా అంటే  ఆ టైం కి అలా వెళ్ళాల్సిందే  లేకపోతే  ఏదో  లేనట్టే  ఉంటుంది అంటుంది .  

అసలు ఇదంతా ఎందుకు చెప్పొచ్చానంటే ...  ఎప్పటినుండో అంటే ఐదారేళ్ళ నుండీ  సాయంత్రపు నడకకు పోవాలని బద్దకిస్తూ వస్తున్న నేను  ఎలాగో ఆ  బద్దకాన్ని కాస్త వదిలించుకుని ఈ మధ్యే  మా వాకింగ్ బాచ్  లో  
 జాయినయ్యా :)  . ఆబ్సెంట్లు ఎక్కువ లేకుండా  సాధ్యమైనంతవరకూ  రోజూ  మానకుండా  వాకింగ్ కి వెళ్లాలని గాట్టిగా  నిశ్చయించేసుకున్నా :) 

పచ్చని పొలాల మధ్య లో ,సాయం సంధ్య  వేళ  నడక  మాత్రం భలే  ఉంది . అసలు  నడిచినట్టే ఉండటం లేదు .చుట్టూ ఇలాంటి దృశ్యాలు కనబడుతుంటే  వాటిని చూస్తూ పోతుంటే  ఎంత దూరం వెళ్ళామో ? ఏం తెలుస్తుంది !

                      
                                                       

ఇప్పుడు పుగాకు సీజన్ కావడంతో ఎటు చూసినా పుగతోటలే కనిపిస్తాయి. 




                            

                                                          రేగి చెట్టు

                                                               
                                                                         పొలంలో చెరువు


                       

                                                           


  

14, నవంబర్ 2013, గురువారం

ఈ పువ్వులు నిజంగా దేవకాంతలే !!


 శరద్కాలం లో చెట్టునిండా విరబూస్తాయి ఈ దేవకాంత పువ్వులు.ఈ పువ్వులు  నా దృష్టిలో నిజంగా దేవకాంతలే !! అంతందం వాటిది !

దారిన పోయే ప్రతీఒక్కరి కన్నూ ఆ చెట్టు పైనే ఉంటుంది.ఇక నేనైతే పువ్వులున్నన్ని  రోజులూ కాసేపైనా  దాని చుట్టూ తిరుగుతూ ,చూస్తూ ఉంటా...ఉదయం చెట్టు చుట్టూ రేకలు రాలి పడుంటే  చుట్టానికి రెండు కళ్ళు చాలవంటే నమ్మండి !

అందుకే మూడో కన్నుతో కూడా చూస్తా! అప్పుడప్పుడూ :)) 

మీరు కూడా చూస్తారా? మా దేవకాంతల్ని ...