=''/>
వ్యవసాయం లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
వ్యవసాయం లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు

4, జులై 2014, శుక్రవారం

ఊడ్పులు మొదలయ్యాయి !

అసలు ఈ రోజులొచ్చేటప్పటికి వర్షాలు పడుతూ ఊళ్ళో రైతులూ,పనులకి పోయేవాళ్ళూ కూడా బిజీ బిజీ అయిపోతారు. 

అటువంటిది జూలై నెలొచ్చినా  వడగాలులతో కూడిన ఎండలు ఉంటే ఇంకా ఏం పనులు జరుగుతాయి.
ఈ ఎండలకి కరెంట్ కూడా ఉండక సమయానికి తడుల్లేక పంటలు చాలా చోట్ల ఎండి పోతున్నాయి.మాకు త్రీ ఫేస్ కరేంట్ వుంటే కాస్తలో కాస్తైనా ఏదో పనులు జరుగుతుంటాయి.

వర్షాలు లేకపోయినా సమయానికి పనులు మొదలు పెట్టడం రైతు కి అలవాటైన పని కదా !

ఓ వారం పది రోజుల కైనా కాలం కలిసొచ్చి వానలు పడతాయన్న నమ్మకంతో.. . .ఆ వచ్చే పోయే కరెంట్ నే నమ్ముకుని  దమ్ములు చేసి ఊడుపులు మొదలుపెట్టారు !











28, ఆగస్టు 2013, బుధవారం

మా సేంద్రీయ వ్యవసాయం ....ముడిబియ్యం (బ్రౌన్ రైస్)

ఇప్పుడిప్పుడే (నాలుగేళ్ల నుండి )మా వాళ్ళు సేంద్రీయ పద్దతిలో గోమయం తో , ఎటువంటి ఎరువులూ ,పురుగుమందులూ వాడకుండా వరి వ్యవసాయం చేయడం  అలవాటు చేసుకుంటున్నారు.





మొదట్లో వర్మికంపోస్ట్  ట్రై చేసారు అది కుదరలేదు .సుభాష్ పాలేకర్  ఉపన్యాసాలు,పుస్తకాలు చూసి ఎలాగూ ఆవులు ఉన్నాయి  కదా గోమయంతో చేద్దామనుకుని మొదలు పెట్టారు .  ఆవు మూత్రం ,పేడ ,కొద్దిగా బెల్లం ,ఇసుక అన్నీ ఒక డ్రం లో కలిపి వారం రోజులు మురగ బెట్టి చేలో నీటితో పాటు వదిలేస్తున్నారట. కొత్తలో ఇలా చేయడం కాస్త కష్టంగా అనిపించింది కానీ ఇప్పుడు పరవాలేదు .

అలాగని మొత్తం వరి చేనంతా  కాదు.మాకు తినడానికి సరిపడా చేస్తున్నారు.మిగిలింది  మాములుగానే .అంతా అలానే చేయొచ్చుగా అంటే , ఈ పద్దతికి బాగా అలవాటుపడ్డాక మొత్తం సంగతి చూద్దాం అంటారు.

 సేంద్రియ పద్దితిలో పండించినా ,ఎన్నో ఏళ్ల నుండి ఎరువులు వాడటం వలన వాటితాలుకు ప్రభావం మెదటి రెండేళ్ళు  వచ్చిన ధాన్యంపై ఉంటుంది . తరువాతనుండి ఎటువంటి రసాయనాలు  తగలకుండా  స్వచ్చంగా పొందుతున్నాం ..                        




                                                 పై పొట్టు మాత్రమే ఒలిపించిన  ముడిబియ్యం 

ఇప్పుడు  చాలా మంది ఆరోగ్యానికి మంచిదని ముడిబియ్యాన్ని వాడుతున్నారు.

అసలు మా అందరికీ ముడిబియ్యాన్ని అలవాటు చేసింది మా మావయ్య (అమ్మ తమ్ముడు ) .తను ముందు మొదలు పెట్టాడు.బియ్యం మిల్లుకు వెళ్లి  ఎలా ఆడాలో దగ్గరుండి వాళ్లకు వివరంగా చెప్పి  చేయించుకున్నాడు.మిల్లులో మొదట వడ్లు వేయగానే పైపొర మాత్రమే పోతుందట .అప్పుడే  ఆపేస్తే  ఇలా అచ్చంగా ముడి బియ్యం వస్తుంది.

మామూలు  బియ్యాన్ని చూసిన  కళ్ళతో ముడిబియ్యాన్ని చూస్తే ముతక బియ్యం లా అనిపిస్తుంది.   ఈ బియ్యంతో అన్నం వండటానికి (తినటానికి)తలక్రిందులు పడేవాళ్ళము కొత్తల్లో .. .  తెల్ల బియ్యం కన్నా ఎక్కువ నీళ్ళు పడతాయి .ఉడకటానికి ఎక్కువ టైం పడుతుంది.మామూలు కుక్కర్ల  కన్నా  కరెంట్ రైస్ కుక్కర్లు బాగుంటాయి ముడిబియ్యం వండటానికి. 

ఈ అన్నం తినడానికి పెద్దవాళ్ళం తొందరగానే అలవాటు పడ్డాము కానీ మా సాయి మాత్రం మంచి కూరలు వండినప్పుడు కూడా ఈ అన్నమేనా అని సణుక్కుంటూ తింటాడు .(మంచి కూరలంటే  తెలుసుగా :) )వాడు హాస్టల్ నుండి వచ్చినప్పుడు వాడికి మాత్రమే ఎప్పుడన్నా   తెల్లన్నం వండుతాము .ఎప్పుడూ  ముడిబియ్యమే వాడతాము.దీనికి అలవాటు పడ్డాక తెల్లన్నం  రుచీ పచీ  లేనట్టు అనిపిస్తుంది.



3, డిసెంబర్ 2012, సోమవారం

యంత్రంతో వరిచేను కోతలు పూర్తయ్యాయి.(చిత్రాలు)


నీలం తుఫాను కి  చేలు  మునగటం  వలన   కాస్త నష్టం  వచ్చినా,జయప్రదంగా  కోతలు పూర్తయ్యాయి.నాలుగేళ్ల నుండి వరిచేను  కోతలు కోత యంత్రం  తోనే  జరుగుతున్నాయి. కూలీల తో  కోయించడానికి   కూలీలు కూడా దొరకటం లేదు .అందరూ యంత్రం తోనే కోయించడానికి  అలవాటు పడిపోయారు.








  






 వరదనీటి తోపాటు చేలోకి  కొట్టుకొచ్చిన ఎర్రమట్టి  వలన యంత్రం కోస్తుంటే  చుట్టూ దుమ్ము ఇలా కమ్మేసిందట.





5, నవంబర్ 2012, సోమవారం

ఈ నీలం మమ్మల్ని వదిలేటట్టు లేదు!



నీలం ఎఫెక్ట్ మనకుండదులే! తమిళనాడు వైపు ఉంది అనుకున్నారు . వార్తల్లో తీరం దాటి పోయిందన్న వార్త చూసి   పరవాలేదు గండం గడిచింది   అన్నారు .

తీరం దాటిన తరువాత దాని ప్రభావమంతా మన రాష్త్రం మీద పడింది.ఉత్తర ,దక్షిణ  కొస్తా అంతా అతలాకుతల మైపోయింది.

 చాలా చోట్ల వరద నీరంతా ఊళ్లను,పొలాలనూ ముంచెత్తింది.తినడానికి, ఉండడానికి లేక జనమంతా చాలా కష్టాలు పడుతున్నారు.

మా  వరిచేలు పది పదిహేను రోజుల్లో కోతకు సిద్దమవుతాయి. పుగతోటలు (నాట్లు)వేయడం మొదలు పెట్టారు.ఇంకో వారం ఐతే  పూర్తయ్యే  దశలో ఉన్నాయి. ఈ టైం లో  పడిన వర్షాలు ,వరదల వలన మా వరిచేనంతా  వరద నీటిలో మునిగి పోయింది .ఎప్పుడు బయట పడుతుందో తెలియదు. మా   చుట్టూ పక్కల  చాలా మంది పొలాలు కూడా  ఇలాగే  వరదనీటిలో  నానుతున్నాయి..వేసిన పుగతోట ల్లో   మొక్కలు కుళ్ళిపోయాయి.మళ్లీ  తోటలు వెయ్యాల్సిందే .

 పాపం చిన్న రైతులకి ,కౌలు రైతులకి  ఎంత  కష్టం? వాళ్ళతో పోలిస్తే మేము కాస్త పరవాలేదు. కాని,ఇంచుమించు ప్రతీ సంవత్సరమూ కోతల టైము లోనే ఇలా జరుగుతుంది.      
   
 రాత్రంతా పడలేదు తగ్గింది అనుకున్నాము.ఈ రోజు  మళ్లీ  వర్షం పడటం మొదలైంది.ఎప్పుడు  వదులుతుందో ?ఈ నీలం ?




                                                                     మా ఊరి  చెరువు





 





                                   చేతికందాల్సిన  పంట  నీటిపాలు :(

                           
                      చెరువు ని తలపిస్తున్న    మా పొలం వెళ్ళే దారి     

15, అక్టోబర్ 2012, సోమవారం

కాకులు,కొంగలు ట్రాక్టర్ వెనుక...ఎందుకు?




మా  ఇంటి పక్కనే పొలముంటుంది .ఏమి  తోచనప్పుడల్లా  ఆ పొలంలో కూలీల పని పాటలు    చూస్తుంటా.


చాలా సార్లు  ఆ పొలంలో  ట్రాక్టర్  దున్నుతుంటే,  కాకులు,కొంగలే కాకుండా  ,గోరింకలు ,పిచుకలు వంటి చిన్న
చిన్న పక్షులు కూడా ట్రాక్టర్ వెనకాలే ఎగురుతూ  వెళ్ళడం  చూస్తుండే దానిని .అవి అలా ఎగురుతూ  కిందవాలి
,మళ్ళా  ఎగురుతూ ఉంటాయి .ఇవేమిటి ? ట్రాక్టర్ వెనకాల  ఇలా ఎగుతున్నాయి ?అనుకునేదానిని .



మాకు ఇప్పుడు పుగతోటలు వేసే  రోజులు.అందరూ  దుక్కులు దున్ని తోటలు వేసే పనిలో ఉన్నారు.పక్క పొలం
 రైతు కూడా  ట్రాక్టర్  తో   దున్నిస్తున్నాడు .నిన్న   దున్నుతుంటే గమనిస్తున్నాను  ....మళ్ళీ అలాగే పక్షులు ఎగురుతూ ట్రాక్టర్ తో పాటు  వెళుతున్నాయి...

అలా దున్నడాన్ని బాగా  గమనిస్తే  నాకు  అసలు విషయం తెలిసిపోయింది.    ట్రాక్టర్ దున్నేటప్పుడు  భూమి లోపలి  చిన్న చిన్న పురుగులు     పైకి వస్తాయి  కదా! వాటిని తినడానికే    అవి అలా  ట్రాక్టర్  వెనకాలే  ఎగురుతూ   వస్తున్నాయని.


  








ఈ ఫొటోలు తీస్తున్నపుడే  సన్నగా వర్షం తుంపర   మొదలైంది .























24, జనవరి 2011, సోమవారం

యంత్రం సహాయంతో వరిచేలో ఊడ్పు( నాట్లు)

వ్యవసాయం చేయడం అంటే ఈ రోజులలో ఎంత కష్టమైన పనో అందరికీ తెలిసిందే....

వ్యవసాయ పనులకు వచ్చే కూలీల రేట్లు పెరిగాయి. ఎరువులు ,పురుగుమందుల రేట్లు పెరిగిపోయాయి. ఇవన్నీ చాలవన్నట్టు అడపా దడపా ప్రకృతి వైపరిత్యాలు పలకరిస్తుంటాయి. ఐనా ఎంతో శ్రమ పడి అన్నింటినీ తట్టుకుని పంట పండిస్తే గిట్టుబాటు ధర రాదు. కష్టమైనా నష్టమైనా రైతు వ్యవసాయం చేయక మానడు..

మా వైపు ఇప్పుడిప్పుడే యంత్రాల సహాయంతోవ్యవసాయం చేయడానికి అలవాటుపడుతున్నారు.

నాలుగేళ్ల నుండి వరిచేను కోతలకు చాలామంది కోత మిషన్ ను ఉపయోగిస్తున్నారు.

మాకు ఇప్పుడు దాళ్వా పంటకి వరి నాటే యంత్రం ఉపయోగించి వరిచేలు ఊడుస్తున్నారు(వరి నాటడాన్ని ఉడ్పుఅంటారు ).

పన్నెండు మంది కూలీలు రోజుకి ఒక ఎకరం ఊడుస్తారు.వాళ్ళు సరిగ్గా టైం కి వచ్చి బాగా చేస్తే ఇంకో అరెకరం ఎక్కువ అవుతుంది అంతే .పైగా వాళ్ళని ట్రాక్టర్ పై తీసుకెళ్ళడం ,తీసుకురావడం ఓ పని .

వరి నాటే యంత్రమైతే రోజుకి నాలుగెకరాలు ఊడుస్తుంది.ఎప్పుడూ కట్టేలాగా నారుమళ్ళు కట్టక్కర్లేదు .వాళ్ళే ట్రే లలో మట్టి నింపి విత్తనాలు వేసి కొంచెం మొలకలోచ్చేక మనకి అందజేస్తారు.. అవి పెరిగేక వాళ్ళే మిషన్తో వచ్చి ఉడ్చేస్తారు..వాళ్ళ మనుషులు ముగ్గురుంటారు .అంతా వాళ్ళే చూసుకుంటారు.మాములుగా కూలీలతో ఐతే కూలీలతో పాటు ,రైతు,పాలేళ్ళు అందరూ అక్కడే ఉండి హడావిడి పడాలి.

పుగాకు తోటలు వేయడానికి కూడా ఇలా మిషన్లు వస్తే బాగుంటుంది.పుగాకైతే అన్ని పనులకీమిషన్లు ఉంటే మా వాళ్లకు చాలా శ్రమ తగ్గుతుంది.





ట్రే లలో సిద్దంగా ఉన్న నారు.


పై చిత్రాలకి ,ఈ చిత్రానికి తేడా చూసారా??చేనంతా ఎలా హడావిడిగా ఉందొ!

ఇలా వ్యవసాయ పనులకు యంత్రాలు వాడటం వలన కొంతవరకూ ఖర్చు కలిసొస్తుంది .అలానే శారీరక శ్రమా తగ్గుతుంది.

10, డిసెంబర్ 2010, శుక్రవారం

ఇవేమి వర్షాలు ?మాకొద్దు బాబోయ్ :(

ఈ మూడు రోజు ల నుండి కురిసిన వర్షాల వలన ఎక్కువగా నష్ట పోయింది ఎవరంటారు??ఇంకెవరూ మేమే ( రైతులే) :(( .

గడిచిన నాలుగు నెలలుగా వానలు ఏదో రూపంలో రైతులను దెబ్బ తీస్తూనే ఉన్నాయి.

ఈ సంవత్సరం సకాలంలో పడిన వర్షాల వలన వరిచేల ఊడ్పులు సరైన సమయం లో ఐపోయాయి . కానీ తరువాత విపరీతంగా కురిసిన వర్షాలకు మా వరిచేలు మునిగి రెండు రోజులున్నాయి .ఎలాగో నీళ్ళలో నుండి బయటపడి తేరుకు న్నాయనగానే , మళ్ళి నెలకు కురిసిన భారీ వర్షాలకు మా పొలం పక్కనున్న కాలవకు గండి పడి మూడు రోజులుమునిగి ,నానిపోయి చచ్చీచెడి ఎలాగో బయట పడ్డాయి..

మధ్య మధ్యలో జల తుఫానని ,అల్పపీడనాలని ,వాయుగుండాలని అడపా దడపా వానలు పడ్డాయి కానీ ఎలాగో వీటన్నిటి బారీనుండి తప్పించుకుని వరి చేలు కోతలకు వచ్చాయి. మిషన్ తోటేగా కోయడం మూడు రోజులలో అయిపోయాయి. అమ్ముడానికి ఇప్పుడు మంచి రేటులేదని ,బస్తాల్లో ఇంటికితెచ్చి నిలవ చేయడానికి అన్నీ సిద్దం చేసారు.. ఈ వెదవ వర్షాలు ఒక్క రోజాగితే ..కష్టపడి పండించిన పంట ఇంటికి చేరేది. ప్చ్ :( ఏంచేస్తాం??పైన ఎన్ని కప్పి ఉంచినా వర్షాలు బాగా పడటంతో కళ్ళం లో ఉన్న ధాన్యం తడిచి పోయి చేలోనే ఉంది.ఏంచేయడానికి లేదు.. రెండు రోజులనుండి కురిసిన వానలకు మడులన్ని నిండి అవి బయటకు తీయడానికి లేదంట. చాలా మందికి ఇలాగే అయింది.

వరిచేను గొడవ ఇలా ఉంటే ,పుగతోటల పని ఇంకా గొప్పగా ఉంది.

మాకు ఇప్పుడు" పుగాకు" సీజన్ .ఈ పుగతోటల పనులు మొదలైతే అంతా బిజీ బిజీగా ఉంటారు . నారుమళ్ళు కట్టడం దగ్గర నుండి ,పుగాకు గ్రేడింగై .. అమ్మకాలు అయ్యేవరకూ పుగతోటని, పుగాకు ని చాలా జాగర్తగా చూస్తారు.ఒక్క ఆకు కూడా పోకుండా చూడాలి.పెరిగే దశ లో వానలు అసలు పడకూడదు. వాన నీటిలో తడిసిన ఆకులు బరువును ,జిగురు కోల్పోయి ఉడికించేటప్పుడు నల్లగా మాడిపోతాయి.మంచి రంగురాదు .అలా ఐతే ఆ పుగాకు కు ధర సరిగారాదు.పెట్టిన పెట్టుబడి,శ్రమ అంతా వృదా అవుతుంది. అందుకే చాలా జాగర్తగా వాటిని చంటిపిల్లలను చూసినట్టు చూడాలి అంటారు.

పుగ తోట లకి జులై లో నారుమళ్ళు పెంచుతారు సెప్టెంబర్ నెల మధ్య నుండి తోట వేయడం మొదలుపెడతారు. ఇదిగో ఈ వర్షాలకు అలా అలా అక్టోబర్,నవంబర్ వరకూ వేస్తానే ఉన్నారు. అస్తమానూ కురుస్తున్న వానలకు చచ్చిపోయిన మొక్కల స్థానం లో కొత్తమొక్కలు వేస్తూ ఎలాగో ఇప్పటికి ఓ దశ పూర్తైందని ,కాస్త విశ్రాంతిగా ఉన్నారో లేదో మళ్ళి వర్షాలు బాగా పడటంతో నీళ్ళు నిల్వ ఉండి పోయి సగం మొక్కలు కుళ్ళి ,కొన్ని తలలు వాల్చి తోటలన్నీ నానా బీబత్సంగా ఉన్నాయంట.

మన ప్రభుత్వం వారు ఏరియల్ సర్వేలు చేసి ,రకరకాల ప్రకటనలు చేయడమే కానీ అవి రైతులకు ఏమేరకు ఉపయోగపడ్డాయో అని కూడా చూడరు.

ఎన్ని కష్టాలు ఎదురైనా రైతు తను నమ్ముకున్న ఆ భూమాత పైనే ఆధార పడి ముందుకు సాగాలిగా..

3, సెప్టెంబర్ 2010, శుక్రవారం

అనావృష్టి ,అతివృష్టి





నీరు పెట్ట లేక ఊడ్చిన వరిచేనుని అలా వదిలేసా రు. .




నిరుడు ఈ రోజులలో వర్షాలు సరిగా లేక వరి చేలకు నీళ్ళు లేక చాలా ఇబ్బందులు పడ్డారు .మాది మెట్ట ప్రాంతం అవటంతో ,మా వైపు ఎక్కువగా బోర్లు నుండి వచ్చే నీళ్ళ తోనే వ్యవసాయంచేస్తారు.వర్షాలు సకాలంలో పడకపోతే బోర్ నీళ్ళ తో ఎంతని వ్యవసాయం చేస్తారు .


ఈ ఏడు వానలు చాలా ఎక్కువగా పడుతున్నాయి .ఈ సంవత్సరం జూన్ మొదటి వారంలోనే ఋతుపవనాల రాకతో మొదలైన ఎడతెరిపిలేని వర్షాలవలన అప్పుడే ఈ ఏడు సాదారణ వర్షపాతం కంటే ఎక్కువ వర్షపాతమే నమోదైనదంటున్నారు. సాదారణంగా అక్టోబర్,నవంబర్ నెలల మధ్యలో ఏర్పడే వాయుగుండా ల వలన గానీ,తుఫాన్ల వలన కానీ నదులు ,కాలువలు ,చెరువులు నిండి వరదలు అవీ వస్తూ ఉంటా యి కదా .మాకు ఈ వర్షాల వలన ఎర్రకాలువ(ఈ ఎర్రకాల్వ మా పొలం పక్క నుండి వెళుతుంది . ) నిండి చేలకు నష్టాన్ని కలిగిస్తాయి .రెండు సంవత్సరాల క్రితం ఐతే ఈ వరదలకు, కోతకు వచ్చిన వరిచేను వారం రోజులు నీట మునిగి పోయి పంట చేతికి రాకుండా పోయింది .అప్పుడు కాల్వకు గండి పడిరైతులకు బాగా నష్టం వచ్చింది . ఇది చెరువనుకున్తున్నారా?కాదు మా వరిచేనే .వరదనీటిలో మునిగి ఇలా చెరువు ను తలపిస్తుంది .


ఆ గండి ని పుడ్చక పోవటం వలన క్రిందటి నెలలో కురిసిన వానలకు వచ్చిన వరదకు మా చేను ఒక్క రోజు మునిగి పోయింది .మళ్ళీ పది, పదిహేను రోజులనుండి కురుస్తున్న వర్షాలకు ఎర్రకాల్వ లోకి బాగా వరద నీరు వచ్చి చేను మునిగి పోయి మూడు రోజులుంది.కానీనీళ్ళలో మునిగింది మూడు రోజులే కావడం, ఇంకా కంకులు వేయక పోవడంతో నష్ట మేమీ ఉండదంట.

వరద నీటికి ఎలా పడిపోయిందో చుడండి . ప్రస్తుతం చేలో నుండి వరద పోయింది .ఒక వారం పొతే నెమ్మిదిగా చేనంతా తేరుకుంటా దంట .( మందులు బాగా వేస్తారేమో )

అయినా ఈ సంవత్సరం వర్షాలు ఎక్కువగానే పడతాయం టున్నారు .ఇంకా ఎన్ని సార్లు వరదలొస్తాయో ఏమిటో? రైతులకు ఏంటో ఎంత కష్ట పడుతున్నా ఎప్పుడూ అతివృష్టి ,అనావృష్టి ఏదో ఒకరూపంలో నష్టాన్ని కలిగిస్తూనే ఉంటాయి . .

10, జూన్ 2010, గురువారం

ఏరువాక ఆరంభం


ఏరువాక సాగాలోరన్నో రైతన్నా..

నీ కష్టమంతా తీరునురోరన్నో రైతన్న...

అని గ్రీష్మఋతువు తరువాత ప్రారంభించే ఏరువాక పురస్కరించుకుని ఒక సినీకవి రాసినపాట ఇది.

జనరంజకమైన ఈపాట గ్రామీణ వ్యవసాయానికి ఏరువాక ప్రాధాన్యతను తెలుపుతుంది .

మంగళవారం నుంచి ప్రారంభమైన మృగశిర కార్తె వ్యవసాయ పనులకు ప్రారంభసూచిక .నాడు నాగళ్ళతో పనులు ప్రారంభిస్తే నేడు యాంత్రీకరణ ఏరువాక రూపు మార్చివేస్తుంది






మృగశిర కార్తె మంగళవారం నుండి ప్రారంభమైంది .రోళ్లను పగలగొట్టే రోహిణీకార్తె (మే నెల మధ్యనుండి) తరువాత వచ్చే ఈ కార్తె కి వ్యవసాయ రంగం లో ఎంతో ప్రాముఖ్యతుంది.
ఖరీఫ్ పనులు ఈకార్తె లోనే ప్రారంభమవుతాయి. ఈశైన్య ౠతుపవనాలు తొందరగా కరుణిస్తే తొలకరి జల్లులతోడ్పాటుతో రైతులు తమ పనులకు శ్రీకారం చుడతారు .

ఏరువాక పేరుతో నాటి రైతులైతే ,నాగళ్ళు బుజాన వేసుకుని కాడెద్దులతో దుక్కిదున్ని భూమాత ,గంగమ్మతల్లికి,వరుణదేవుడికి పూజలు చేసి పనులు ప్రారంభించేవారని మాతాతగారు అంటారు.

రొజులుమారాయికదా ప్రస్తుతం నాగళ్ళకు బదులు ట్రాక్టర్ లతో ఏరువాక పనులు ప్రారంభమవుతున్నాయి.

డెల్టా ప్రాంతాలలో ఈకార్తెలో నే గోదావరి జలాలను వదులుతారు .పనులుకూడా ఇప్పుడే మొదలుపెడతారు . పదకొండురోజుల పాటు ఈకార్తె ఉంటుంది .


29, డిసెంబర్ 2009, మంగళవారం

కోత యంత్రం తో వరి చేను కోతలు


మా వరిచేను కోతలు పూర్తయ్యాయి .గతరెండేళ్ల నుండి కోతమిషన్ సాయం తో వరిచేలు కోస్తున్నారు .
కూలీ ఖర్చు బాగా పెరిగిపోయి చాలా మంది మిషన్ తో కోయడానికే ఇష్టపడుతున్నారు . కూలీ లు పన్నెండు మంది

రోజుకి ఒక ఎకరం కోస్తే ,మిషన్ గంటలో ఎకరం కోస్తుంది .మళ్ళీ వాళ్ళను తీసుకురావడాము ,పంపడము చేయాలి .
మిషన్ వచ్చాక ఆ గొడవలేమి ఉండడములేదు .కోసేవాడు మిషన్ తో వచ్చి కోసేసి వెళుతున్నాడు .

ఇప్పుడు కూలీ రేట్లు కూడా బాగా పెరిగి పోయాయి . ఆడవాళ్లకు నూటయాబై ,మగవాళ్లకి రెండువందల
యాబై తీసుకొంటున్నారు .మిషన్ కి ఐతే ఎకరాని కోయడానికి ఈ సంవత్సరము తొమ్మిది వందలు తీసుకొన్నారు .నిరుడు కొత్త కావడం,మిషన్లు కూడ తక్కువ వుండముతో పదిహేను వందలు తీకున్నారు .ఎక్కువగా అవితమిళనాడునుండి వచ్చాయి .ఈ సంవత్సరము కొంతమది రైతులు కలసి మిషన్లు కొన్నారు అందుకే కొద్దిగా రేటు కూడా తగ్గింది .

ఈమిషన్ వచ్చాక మావాళ్లకు మాత్రం చాలా హాయి గాఉంటుంది .వాళ్ళు ఎంతమంది వస్తారో ,ఎప్పుడు వస్తారు అన్న టెన్షన్ లు ఏవీ ఉండటము లేదు . రెండు రోజులలో నే కోతలు అయిపోతున్నాయి .

ఇలా అన్ని పనులకు మిషన్ లు వస్తే వ్యవసాయము చేయడము తేలిక అవుతుంది . ఖర్చులు కూడా తగ్గుతాయి .