=''/>
రుచి చూడు . లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
రుచి చూడు . లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు

22, డిసెంబర్ 2014, సోమవారం

పనసపొట్టు కూర


  ఈ రోజుల్లో  మా వైపు కార్తీక మాసం రావడం తోనే పనసకాయలకోసం వేట మొదలు పెట్టేస్తారు .ద్వాదశి  బోజనాలు ,వన బోజనాలు ,అయ్యప్పల బోజనాలకనీ,ఈలోపు ఏవన్నా  ఫంక్షన్స్ వస్తే   వాటికి " పనస పొట్టు "  కూర మెనూ లో తప్పని సరన్నమాట .   
ఎవరన్నా  పనసకాయల కోసం వస్తే వాళ్లకిస్తూ ఎప్పుడన్నా ఇంటికి తెస్తే ఆ కాయను  పొట్టు    కొట్టాలంటే  బిందిలింగం ( ఊరుమ్మడి వడ్రంగి ) రావాల్సిందే .. 


మొన్నోరోజు అలాగే తెస్తే  పోట్టు కొట్టించి మొదటిసారి నేనే స్వయం గా కూర చేసా .అంటే ఎప్పుడూ చెయ్యడం కష్టం ,పెద్దవాళ్ళు చేసినట్టు చెయ్యగలనో  లేదో  ,ఆ రుచి నాకు వస్తుందా ఇలా అనుకుంటూ  ఎవరో ఒకరి తో  వండించడమే అన్నమాట  .   
పనస పొట్టు కూర  వండటం  ఎంతో  తేలికని    మొదటి  సారి తెలిసింది .. 
ఎంత తేలిక గా చేయ్యోచ్చంటే  .. 
 పనస పొట్టుకి సరిపడా చింతపండు గుజ్జు తీసుకుని,  కుక్కర్లో  పొట్టు తో పాటు చింతపండు గుజ్జు  ,  రెండో ,మూడో ఎన్ని  పడతాయంటే అనుకుంటే అన్నిపచ్చి మిరపకాయలు మధ్య కు కోసుకుని అవీ,సరిపడా ఉప్పు వేసి, కొంచెం పసుపు, నీళ్ళు చాలా కొద్దిగా చూసుకుని పోసుకోవాలి. పొట్టు కాస్త ఆవిరి  కి  ఉడికి పోతుంది .  కుక్కర్ మూత పెట్టి మూడు కూతలు వేసేక స్టౌ కట్టేసుకోవాలి .  
కుక్కర్ మూత తీసుకుని నీరు   ఉంటే   పోయే వరకూ ఉడకబెట్టుకుని   ,
జీడిపప్పు,వేరుసెనగ గుళ్ళు ,సెనగపప్పు,మినప్పప్పు,ఆవాలు,జీలకర్ర ,ఎండుమిర్చి ,కరివేపాకు తో తాలింపు పెట్టుకుని కూర   వేడి తగ్గాక  కాస్త  ఆవపిండి కలుపుకుంటే పనస పొట్టు  కూర తయార్  :) 



ఇప్పుడిప్పుడే వస్తున్న  లేలేత  గింజ పట్టని చిన్న చిన్న పనసకాయల పై   తొక్క తీసేసి కడిగి ,కాస్త పసుపు నూనె రాసి ఇలా పొట్టు  కొడతారు .






16, జూన్ 2014, సోమవారం

కొబ్బరచ్చు (కోకోనట్ బర్ఫీ)

పిల్లలకి బాగా నచ్చే ,తేలికగా చేసుకునే స్వీట్ ఈ" కొబ్బరచ్చు " ! దీనిని కోకోనట్ బర్ఫీ అంటారు  . మేమైతే కొబ్బరి పాలకోవా  అనికూడా అంటాం . 

నేను పిండివంటలూ,స్వీట్సూ అస్తమానూ చేస్తూనే ఉంటా కానీ , చాలా వాటికి  కోలతలు మర్చిపోతుంటా .చెయ్యడానికి అన్నీ దగ్గర పెట్టుకుని అత్తయ్య కో ,అమ్మమ్మ కో ఫోన్ చేసి కొలతలన్నీ వివరంగా తెలుసుకుని  మొదలుపెడతానన్నమాట . ఎప్పటికప్పుడు ఈసారి పుస్తకం లో రాసుకోవాలి అనుకుంటా కానీ ఆ పనయ్యాక బద్దకం వచ్చేస్తుంది. 

ఇంతకీ ఈ స్వీట్ గురించి చెప్పకుండా నాబద్దకం  గురించి ఎందుకు చెబుతున్నానంటే ..

ఈ కొబ్బరచ్చు  చెయ్యాడానికి తీసుకునే సరుకుల పాళ్ళన్నీ సమానంగా తీసుకుంటే చాలు.అందుకని   ఇది చేసినప్పుడు మాత్రం   ఎవరికీ ఫోన్ కొట్టే పనుండదు .ఈజీగా పనై పోయినట్టుంటుంది    . 

 కొబ్బరచ్చు  చెయ్యడానికి  కావలిసినవి  - కొబ్బరి కోరు,పంచదార ,పాలు  . 

 ముందు చెప్పినట్టే  అన్నీ సమానంగా తీసుకోవాలి . తీపి తక్కువగా  తినేవాళ్ళు  పంచదార కాస్త తగ్గించుకుని వేసుకోవచ్చు . 



 

అడుగు మందమున్న  గిన్నెలోకి కానీ,మూకుట్లోకి కానీ కొబ్బరి కోరు,పంచదార ,పాలు సమానంగా తీసుకుని ,పొయ్యి మీద పెట్టి  పాలు మొత్తం ఇగిరి పోయి ముద్దైపోయేలా తిప్పుకోవాలి . 




 ఆఖరి కొచ్చేట్టప్పటికి మంట తగ్గించుకుని సన్న మంట పై తిప్పుకుంటే  అడుగంటుకుని రంగు మారకుండా ఉంటుంది . 



 ఇంత  దగ్గరగా మూకుడు కి అంటుకోకుండా ఉండాలా,ముద్దలా  అయిపోతుంటే దింపేసుకోవచ్చు . లేకపోతే  ప్లేట్లో  కాస్త వేసి , ఉండ చేసి చూసుకుంటే  తెలుస్తుంది .


ప్లేటుకి  నెయ్యి రాసి దానిపై  ఉడికిన ముద్దవేసి , పలచగా  అద్ది (అద్దే టప్పుడు  చేతులక్కూడా నెయ్యి రాసుకుంటే  చెయ్యి కాలకుండా ఉంటుంది . అద్దేటప్పుడు  చేతికి అంటుకోదు ) కాస్త వేడిగా ఉన్నప్పుడు ముక్కలుగా  కోసుకుంటే విరిగి పోకుండా వస్తాయి.


అదండీ మరి ! నేను కొలతలు మరిచిపోకుండా ,తేలికగా చేసే కొబ్బరచ్చు సంగతి !

చాలా ఈజీగా  చెప్పేసేరు కానీ  చెప్పినంత తేలిక కాదు చెయ్యడం అనుకుంటున్నారేమో ! ఒక్కసారి చేసి  చూడండి  . అప్పుడు మీరే  చెప్తారు కొబ్బరచ్చు చెయ్యడం చాలా ఈజీ .. ఇట్టే  చేసుకోవచ్చు అని :)

తేలికగా చేసేరో ?కష్టంగా చేసేరో ?చేసేక   చెప్పాలి మరి !  

6, మార్చి 2014, గురువారం

పాలకోవా ఎలా చేస్తానంటే ..

నాకు బాగా గా గా చెయ్యడం వచ్చిన ,నేర్చుకున్న మొదటి స్వీట్ "పాలకోవా" !
 బాగా చెయ్యడం రావడం వల్లేమో  ఇంట్లో పాలుండాలే   పిల్లలు ఎప్పుడడిగినా చిటెకలో అంటే ఓ గంటలో చేసేస్తా  :)  .  మరి  పాలకోవా చెయ్యాలంటే కనీసం గంట పడుతుంది.  ఒక లీటరైతే  గంట కి  కాస్త తక్కువ  టైం పడుతుంది కానీ ,ఎక్కువ పాలతో  ఐతే చెయ్యడానికి ఎక్కువ సమయమే పడుతుంది .  
పాలకోవా   ఇత్తడి పళ్ళాల్లో  చేస్తే  బావుంటుంది . ఒక లీటర్ పాలతో ఐతే  అడుగు దళసరి గా ఉన్న గిన్నె వాడొచ్చు కానీ ఇంకా ఎక్కువైతే ఇత్తడి పళ్ళెం కానీ ఇత్తడి మూకుడు కానీ మంచిది . 
 పళ్ళెం  లో ఐతే అడుగంట కుండా తిప్పడానికి తేలికగా వుంటుంది .పాలు తొందరగా ఆవిరవుతాయి .    

ఆవు పాలు పలచగా ఉంటాయి కాబట్టి  గేదె పాలతో చేసుకుంటే  మంచిది. 

  లీటర్ పాలకి   సోల  డు  పంచదార (పావుకేజీ పంచదార  )పడుతుంది . 



పళ్ళెం లో పాలు పోసి  పాలు సగానికి పైగా ఆవిరయ్యేవరకు   తిప్పుకోవాలి .  



పాలు  ఆవిరై చిక్కబడ్డాక పంచదార పోసి ,ఈ సారి  జాగర్త గా   తిప్పాలి. లేకపోతే  అడుగంటుకుని  ఎరుపు రంగులోకి మారిపోతుంది . అలా ఉంటే  రుచి మారక పోయినా మా పిల్లలు రంగు చుసి మాకొద్దంటే మాకొద్దంటారు .


ఇలా దగ్గర పడ్డాక  ,చిన్న ప్లేట్ లో కాస్త వేసి ఉండ చేసి చూసుకుని ఉండైపోతే  ,కొద్ది కొద్ది గా తీసుకుని చిన్న గరిటి తో బాగా పాముకుని చేతికి నెయ్యి రాసుకుని పాలకోవాలు  చేసుకోవడమే . ఈజీ గా చెప్పేసా కానీ ,ఒక్కోసారి   పంచదార పోయ్యగానే పాలు ఇరిగి పోతాయి . అటువంటప్పుడు  అడుగు సమానంగా ఉన్న గిన్నెకి  నెయ్యి రాసి ,విరిగి తొరకల్లా ఉన్న దాన్ని గట్టిగా పామితే బాగానే ఉంటుంది .కాని,పాలు విరక్కుండా ఉంటే  చూట్టానికి ,తినడానికి బావుంటాయి :))


పాలకోవాలు నొక్కడానికి  అచ్చులున్నాయి కానీ, నాకైతే ఇలా వేళ్ళతో చేస్తేనే నచ్చుతాయి . 

9, అక్టోబర్ 2012, మంగళవారం

పెసల మొలకలతో ఇలా కూడా చేసుకోవచ్చు.




పెసలమొలకలలో ఎన్నో పోషకాలు ఉంటాయని, ఆరోగ్యానికి చాలా మంచిదని తెలిసినా సరే!పెసలు

నానబెట్టి,మొలకలు రావడానికి వాటిని  బట్టలో వేసి మూట కట్టడం  ఇదంతా చాలా పెద్ద పనిలా అనిపించి

బద్దకించే  దానిని..






మొలకలకి స్పెషల్ గా చిల్లుల బాక్స్లు ఉన్నాయని తెలిసినా కొనడం  కుదరలేదు. ఎలా ఉంటుందో చూద్దామని  

బత్తాయి జ్యూసర్  లో నానబెట్టిన పెసలు వేసాను .సాయంత్రానికి చక్కగా మొలకలొచ్చాయి. 

ఇది వాడటం తేలికగా అనిపించి   దీనినే మొలకలకి  వాడుతున్నా.
   


 రోజూ    పెసల మొలకలని అన్ని వంటకాలలోను  వాడేస్తుంటా. కూర ల్లో ,ఉప్మా ,మజ్జిగట్లు   ,దోశలు ,చాట్   

ఇలాచెప్పుకుంటూ పొతే  చాలా ఉంటాయి.



                                         మా పిల్లలకి ఇలా చాట్ లా చేస్తే  చాలా  ఇష్టం.  వెంటనే ప్లేట్  ఖాళీ   చేసేస్తారు.

 మొలకలు తింటే  హెల్త్ కి మంచిదిరా .... అని  పిల్లలని తినమంటే  ,ఆవాసన నాకిష్టముండదని    ,టేస్ట్  నచ్చదని  

ఇలా ఏవేవో  ఒకలు పెట్టి  ఇద్దరూ తినేవారు కాదు. ఇప్పుడు  ఇలా  చేస్తుంటే  కిక్కురు మనకుండా తింటున్నారు . 


                                        
   కుడుములు  ఎప్పుడూ  ఒకేలాగా చేయాలా?అని    పెసల మొలకలతో చేశా ...ఎలా ఉన్నాయి ?

8, ఆగస్టు 2012, బుధవారం

పెరుగుపచ్చళ్ళు


తేలికగా  ,తొందరగా చేసేయొచ్చు  అనిపించేవి ఈ   పెరుగుపచ్చళ్ళు.



 తోటకూర,పాలకూర,బచ్చలికూర  పెరుగుపచ్చడికి  బాగుంటాయి. కూరగాయల్లో  పొట్లకాయ పెరుగుపచ్చడికి చాలా  బాగుంటుంది.ఆనపకాయ తో కూడా చేస్తారు కానీ, మావైపు  ఎక్కువగా  పొట్లకాయ తో  చేస్తాము.

 ఆకుకూరైనా ,కూరగాయలైనా   ముక్కల్ని మరీ మెత్తగా కాకుండా ఉడకబెట్టుకుని, వాటిలో నీరు  పిండుకోవాలి.పచ్చిమిరపకాయలు వేయించుకుని  ఉప్పు ,పచ్చిమిర్చి,అల్లం  కలిపి నూరి పెరుగులోవేసి పిండుకున్న ముక్కలు కూడా వేసి బాగా కలుపుకోవాలి.నూరుకునేంత టైం లేకపోతే ,   మిరపకాయలు,అల్లం చిన్నముక్కలుగా కట్చేసి తాలింపు లో కలిపి వేయించుకున్నా  పరవాలేదు.కానీ,వేయించిన  మిరపకాయలు నూరి  కలిపితే ఉప్పు ,కారం  బాగా కలుస్తుంది .     వేయించిన అల్లం ముక్కల రుచి  బాగుంటుంది. . అలా ఇష్టమైనవారు  అల్లం ముక్కలు కలుపుకోవచ్చు.

 ఇక తాలింపు  సంగతికొస్తే  ... తాలింపు మినప్పప్పు ,  జీలకర్ర ,ఆవాలు,ఎండుమిరపకాయలు,కరివేపాకు ,తో పాటు మెంతులు కూడా వేసుకుని పెట్టుకోవాలి. మెంతులా...  అని మొహం     చేదుగా  పెట్టకండి. వేగిన మెంతుల రుచి చాలా బాగుంటుంది. మాకైతే మజ్జిగచారు,పెరుగుపచ్చడి కి తాలింపు లో  మెంతులు తప్పనిసరిగా ఉండాల్సిందే.  తాలింపు పెట్టుకున్నాక ఒక ఉల్లిపాయ చిన్న ముక్కలుగా కోసి  కలుపుకోవాలి.  వీటిని వేయించుకోవక్కర్లేదు.పచ్చి ముక్కలే బాగుంటాయి.

కొబ్బరి తో కూడా చేసుకోవచ్చు.కొబ్బరికోరు,మిరపకాయ తొక్కు,పెరుగులోకలుపుకుని తాలింపు పెట్టుకుకొవడమే.కానీ ,దీనిలో ఉల్లిపాయ ముక్కలేయరు.ఇది  ఇడ్లీల్లోకి  ,దోశల్లోకి  చట్నీలా కూడా బాగుంటుంది. .  

21, నవంబర్ 2010, ఆదివారం

మన బ్లాగ్ వనభోజనాలకి నేనూ, ఆకాకరకాయ కూరతో వచ్చేసానోచ్...

జ్యోతి గారి" బ్లాగ్ వనభోజనాల " పిలుపందుకుని ,నేనూ నా వంటతో సిద్దమైపోయానండోయ్...

నిరుడు ఇలాగే జ్యోతిగారు బ్లాగ్ వనభోజనాలు ఏర్పాటు చేసినప్పుడు ,నేనూ నాకూ తెలిసిన,వచ్చిన వంటతో వచ్చేను.అప్పుడు అందరూ చేసిన రకరకాల వంటకాలతో ..."బ్లాగ్ వనభోజనాల విందు" అదిరిపోయింది.


ఈ" బ్లాగ్ వనభోజనాలు"కి నేను వండుకొచ్చిన వంట....

"ఆకాకరకాయ ఇగురు".

మా వైపు వీటిని ఆకాకరకాయలు అంటారు. వీటిని బోడ కాకరకాయలు అని కూడా అంటారని ఈ మధ్యే తెలిసింది.ఈ ఆకాకరకాయలతో వేపుడు చేయవచ్చు.అలాగే ఇగురు కూరా వండుకోవచ్చు .మేము ఎక్కువగా పాలు పోసి ఇగురుకూర వండుతాము.


ఆకాకరకాయ ఇగురు చేయడానికి కావలసిన పదార్ధాలు:

ఆకాకరకాయలు - 1/4
ఉల్లిపాయలు -4
పచ్చిమిర్చి-3
ఉప్పు
కారం-1/2
పసుపు-కొద్దిగా
పాలు-చిన్న గ్లాస్ లో సగం
అల్లం వెల్లుల్లి ముద్ద-అర స్పూన్

పోపు సామాను:
సెనగపప్పు ,మినప్పప్పు ,ఆవాలు,జీలకర్ర, కరివేపాకు.

ఆకాకరకాయ లు(వీటిలో చిన్న చిన్న గింజలు ఉంటాయి. ఇవి ఇష్టం లేనివారు తీసేసుకుని ముక్కలు కోస్తారు, కానీ గింజలు కుడా రుచిగానే ఉంటాయి.)ఉల్లిపాయలు ,పచ్చిమిర్చి చిన్న ముక్కలుగా కోసుకోవాలి. ముందుగా గిన్నెలో నూని పోసి తాలింపు పెట్టుకుని (ఎండుమిరప అక్కర్లేదు) ,దానిలో ఆకాకరకాయ ముక్కలు వేసి ఐదు నిముషాలు వేయించుకోవాలి. అప్పుడు దానిలో ఉల్లి,పచ్చిమిర్చి ముక్కలు వేసి అన్నింటినీ కాసేపూ వేగనివ్వాలి.అవి వేగేక, ఉప్పు,కారం,పసుపు,అల్లం వెల్లులి ముద్ద వేసికలుపుకుని మూతపెట్టి , చిన్న మంటపై కాసేపు మగ్గనిచ్చి ,తరువాతకొద్దిగా నీళ్ళు పోసి ఉడికించుకోవాలి. ఐదునిముషాలయ్యాక దానిలో పాలు పోసి ,కూర బాగా నీరు లేకుండా ఇగరనివ్వాలి. ఇలా పాలు పోసి ఆకాకరకాయ కూర వండితే కమ్మగా ..మంచి రుచిగా ఉంటుంది. ఈ కూర చపాతీలో కీ ,అన్నం లో కీ కూడా బాగుంటుంది.

ఇదండిమన" బ్లాగ్ వన భోజనాలకి " నేను కష్టపడి వండుకొచ్చిన వంట . రుచి చూసి ఎలా ఉందో చెబుతారు కదా!


మా ఊరి మహిళలం అందరం కలసి క్రితం సంవత్సరంకొబ్బరి తోటలో కార్తిక వన భోజనాలు పెట్టుకుని చాలా సరదాగా గడిపాము. ఈ సంవత్సరం ఇంకా అనుకోలేదు కానీ, పాపి కొండలు అనుకుంటున్నాము....ఏమవుతుందో?

16, డిసెంబర్ 2009, బుధవారం

ఒవెన్ లేకుండానే బిస్కట్లు చేయడం .

*బిస్కట్లు చేయడానికి కావలసిన పదార్ధాలు .
మైదా పిండి -అరకేజీ
పంచదార -పావుకేజీ ,పొడి చేసుకోవాలి.
నెయ్యి -రెండు వందల గ్రాములు .
యాలికల పొడి కొద్దిగా
వంట సోడా -ఒక స్పూన్.
తయారు చేయు విదానం ***

ఒక పెద్ద ప్లేట్ లో మైదా పిండి ,పంచదార పొడి ,నెయ్యి ,సోడా ,యాలిక పొడి వేసి బాగా కలుపుకోవాలి .దీన్ని బాగా కలుపుకొంటే నెయ్యి పైకి తేలుతుంది .ఇప్పుడు చపాతీలు చేసుకొనే పీట మీద ఈ పిండిని వేసి చేతితో పీట అంతాసమానము గా పరుచుకొని చేతితో వత్తాలి .ఇప్పుడు మనకు కావలసిన సైజు లో గుండ్రము గా కాని ,అర్ధ చంద్రాకారము లో కాని కోసుకోవాలి .(చిన్న డబ్బాముతా ను కోయడానికి ఉపయోగించవచ్చు .)
ఇప్పుడు పాత పెనముకాని ,కుక్కరు పాన్ కాని తీసుకోని దానిలో కొద్దిగా ఇసుక వేసుకోవాలి .
దానిని స్టౌ మీద పెట్టి వేడి గా అయ్యాక దానిమీద కోసుకొన్న బిస్కట్లను ఒక సేమంది ప్లేటు లోకాని (స్టీలు ప్లేట్ ఐతే అడుగున అంటుకు పోయి సరిగారావు ),కేకు చేసుకొనే గిన్నెలో కాని అడుగున నెయ్యి రాసి వాటిని జాగర్తగా పెట్టుకొని మూత పెట్టుకోవాలి .చిన్న మంట మీద వేగనివ్వాలి .అడుగున కొద్ది గా ఎరుపు రంగు వస్తే వేగి పోయినట్టే .

2, నవంబర్ 2009, సోమవారం

బ్లాగ్ వనంలో వనభోజనాలు -గుమ్మడికాయ దప్పళం .

మా వైపు ఫంక్షన్లలో ఎక్కువగా గుమ్మడికాయ దప్పళం వండుతారు.
దీనికీ కావలసిన పదార్దాలు ...
గుమ్మడికాయ -చిన్నది ఒకటి .
ఉల్లిపాయలు -రెండు .
పచ్చిమిర్చి -ఆరు
బెండకాయలు -పది .
టమాటాలు -మూడు .
ములక్కాడ -ఒకటి .
వంకాయలు -రెండు .
కొత్తిమీర-ఒకకట్ట .
పోపు పెట్టుకోవడానికి ..
మెంతులు -అర స్పూను
ఆవాలు -అరస్పూను
జీలకర్ర -అరస్పూను

ఎండుమిరపకాయలు-నాలుగు.కరివేపాకుకొద్దిగా .
చింతపండు కొద్దిగా .
బెల్లం కొద్దిగా .
తయారుచేసేవిదానం .....
..
స్టవ్ మీద గిన్నె పెట్టి వెలిగించి దానిలో నీరు పోసి,గుమ్మడికాముక్కలువేయాలి .అవి ఉడుకుతుండగా , ముక్కలుగాకోసుకొన్న కూరగాయముక్కలు దానిలోవేయాలి. ఉల్లిపాయలను చీరికలుగా కోసుకోవాలి.అవి, పచ్చిమిర్చి ముక్కలులుకూడా వేసుకోవాలి .కొద్దిగా వుడికాక ,కారము ,ఉప్పు ,పసుపు వేసుకొని,చింతపండుపులుసు ,బెల్లముకొద్దివేసుకోవాలి.కాసేపు ఉడికేక స్టవ్ కట్టేసుకొని తాలింపు పెట్టుకొని ,కొత్తిమీర జల్లుకోవాలి .

దీనిని ముద్దపప్పులొకలుపుకొని తింటే ఉంటుందీ ..........

పపపపప్పు ..దప్పళం ......వేడి వేడి అన్నం మీద....కమ్మనిపప్పు కాచిన నెయ్యి ...కలిపితే ..భొజనం వనభొజనం ......